Vekst i utkanten

debatt

Flyttinga går ikkje berre ein veg. Dei siste rapportane frå Statistisk sentralbyrå (SSB) om utvikling i folketalet er god lesnad for mange utkantkommunar. Dei minste og mest perifere kommunane i landet har lenge slite med nedgang i folketalet. Ikkje sidan 1980 har desse kommunane hatt auke i folkesetnaden. Det gler meg difor å sjå at nettotala i fjor gjekk frå minus til pluss.

Halvparten av utkantkommunane - 32 av 65- opplevde nemleg auke i folketalet i 2009. Dette skuldast ei rekordhøg tilflytting, mellom anna innvandring, som har halde fram trass i økonomisk vanskelege tider. Samstundes har færre flytta frå utkantkommunane dei siste åra.

Tendensen er altså positiv mange stader i landet. Men me ser at det trengst ein langsiktig innsats for at folk skal få reell valfridom til å busetje seg der dei vil. Mange kommunar har framleis nedgang i folketalet. Langvarig sentralisering har ført til at mange kommunar har få unge i den alderen der det er naturleg å stifte familie og få barn.

Berre ein aktiv politikk for lokalsamfunn, distrikt og regionar kan snu ei slik utvikling. Difor er dei tunge strukturane i samfunnet viktige. Breiband, straum, veg, gode offentlege tenester må vere på plass. Fleire gründerar må få mulegheit til å skape nye arbeidsplassar. Den raudgrøne regjeringa ynskjer å spreie kompetansearbeidsplassane betre i landet. Me har gjeninnført den differensiert arbeidsgjevaravgift, styrka kommuneøkonomi og gitt betre kår for landbruket. Alt dette har mykje å seie for at folk skal kunne busetje seg der dei vil.

I 2010 vil Kommunal- og regionaldepartementet satse enda meir for å styrkje kommunane sitt arbeid med å byggje attraktive lokalsamfunn. Levande lokalsamfunn og profesjonelle kommunar trekker til seg kreative tilflyttarar. Det er avgjerande for å sikre at heile landet blir teke i bruk.



Liv Signe Navarsete (Sp),

kommunal- og regionalminister

Publisert torsdag 25. februar 2010 kl. 00:00.
Sist oppdatert onsdag 10. mars 2010 kl. 16:57.